Was ich dir no ha welle sage...

Kommentieren

Weissch du eigentlich was du alles verpasst hesch? Es sind so viel sache passiert in mim Lebe. So viel Sache wo i so gärn mit dir teilt hät. Ich bi mittlerwiele int Werbebranche ighstiege. Das Hotel Business het mir recht schnell glengt. Ha denn schnell denkt i wott kei zytverschwende und solang i no jung bi chani guet nomol mini branche wechsle.Es schneit grad dusse. Ja, es isch wieder Winter und gli sind ganzi 5 Joor vergange wo mir uns s’letscht mol gseh hän. Ich luege ufe in Himmel und hoffe, dass du mich da unte in mim WG-Zimmer in Züri gsehsch. Ich bi die mite dunkle Hoor und em Pony. Ja, du hättsch bestimmt „luschtig“ gseid, zu mim neue Hoorschnitt. Ich vermisse dich. Grad gester het mich öbis so extrem an dich erinnert. Es goht mir ja eigentlich guet, aber dä Moment gester het mich grad so mitgnoh, dass ichs hütte no spüre. Ich weiss es isch nid in dim Sinn dass irgendöber vo dine gliebte Mensche muess liede. Aber ab und zue chönne mir das wie nid unterdrücke. Und denn muess es halt eifach use. Wo bisch du jetzt eigendlich? Isch es schön dert wo du jetzt bisch? Wenn nid, bisch bi uns natürlich immer wieder herzlich willkomme. Aber ich weiss ja dass das unmöglich isch. Em Mami isch es lang nid guet gange. Aber es wird langsam wieder besser. Sie het leider e Herzkrankheit und muess Tablette näh. Mir luege aber au guet zu ihre. Über Wiehnachte fliege s’ Mami und ich in Süde und löhns uns dört so richtig guet goh. Opa fühlt sich glaubs chli allei nachdem d’Oma ihn verloh het. Aber defür hesch du sie wieder gseh, oder? Sarah isch fliessig an ihrem Studium dra, sie het sehr viel vo dir. Du wärsch sicher stolz uf sie. Liebe Papi, du fehlsch mir. Ich denk an dich!