Humorlos dumm

21.11.2006 um 17:22

Humorlos dumm

Oder: Wirri Gedanke vor em Fürobig

 

Jetzt besseret's langsam. Also wörkli. Ich werde alt, definitiv. Hüt ben i wie en Blöde im Kafi-Egge vore gstande und ha mi gfrogt, wieso dass i eigentlich det vüre be. Ha's vergässe. Drum ben i wieder zrugg a Platz. Und dete esch mer's denn wieder i Sinn cho: Ha eigentlich welle go Vitamin-C-Tablette hole im Schrank. Wil i noimet glääse ha, die seiged guet gäge d'Vergässlichkeit.

So wiit, so schlächt. Aber das esch jo ned emol alles. Wörkli loschtig sii, das klappet i de letschte Zyt au nümm so würkli. Viellicht liiht's am Wätter. Das esch ebe no es guets Stichwort. Über de Mittag han i mim Päcklisuppe-umrüehrende Vater so ganz biiläufig gseid: "Hmmm..s'esch rächt abartig verosse...!". "Jo - s'esch driissg Grad!", seid er do druf. Denn säg ich zu ihm - und ich ha's würkli loschtig gfonde -: "Ah, dorum isch so heiss!?". Er hed mer denn wieder einisch z'erkänne geh, dass mer ned de gliich Humor händ. Guet, wer hed das scho.

Vergässlich und humorlos bin i also. Irgendwie en Kombination, wo unbeliebt macht. Ganz klar. Vor allem vergisst mer, zu wem mer hed welle loschtig sii. Denn probiert mer's halt nomol bi de gliiche Person. Komischerwiis isch's plötzli dopplet so scheisse. Und weniger als halb so loschtig.

Mer chönnt aber au anderi Schlüss drus zieh: Zum Bischpiel dass Päcklisuppe humorlos möched. Viellicht chönnt mer au drüber nodänke, öb Vitamin-C-Tablette genau s'Gägeteil bewürked und eim bereits bim Chauf quasi mit ere Priise Vergässlichkeit infiziered. Guet, so viel Gfohrepotenzial trou i ned emol de Schwiizer Medikamänte-Hersteller zue. Doch: Mer weiss jo nie.Aber wenn mer de Text do obe dureliest, merkt mer ebe scho, dass das mit em Humor bi mir ziemli akut esch. Und was i eigentlich ha welle schriebe, han i vergässe.