"Nächster Halt..."

21.11.2006 à 17:20

"Nächster Halt..."

Oder: D'Zugstimm

 

Ich ha ihn gfrogt, öb er die Frau kännt, wo - via Luutsprächer - gseid hed: "Der Zug trifft in Zürich Flughafen ein. Endstation.". Aber de Kondiktöör antwortet: "Nei." Und luegt mi denn chli komisch ah.

 

Du kännsch sie sicher au. D'Zugstimm. Es esch die schönschti Frauestimm, wo'n i känne. Und jedes Mol - au denn, wenn i weiss, wo de Zug iitrifft - hör i uf z'lääse oder Musig z'lose und wiederhole innerlich, was d'Stimm gseid hed. Inklusiv de churze Pause zwüschet "in" und em Name vo de nächschte Station.

 

Die churz Pause merkt mer fascht ned. Aber halt ebe doch. Sie bewürkt, dass mer es bitzli besser änelost, wie die nächschti Station heisst. Genau dur die churz Pause wachst d'Spannig. Wil d'Frau redt, als wetti sie es Gheimnis verrote. Und de Ort sälber seid sie immer so es bitzli fröhlich. Wie wenn sie sich würd für d'Passagier freue, wo jetzt am Ziel sind.

 

DAS esch miinere Meinig noch Kunscht. Und genau die Frau, wo die Kunscht beherrscht, wetti gern mol kännelehre. Ich glaub, ich würd alles glaube, wo die Frau mit de schöne Stimm zu mir seid. Alles. Drum han i jo de Kondiktöör gfrogt. Nei, er känni sie ned. Und denn hed er mi ebe komisch aagluegt. I sine Auge esch's ebe glaub nur es Tonband. Es Tonband, wo ebe mängisch au de falsch Ortsname seid.

 

Aber us minere Sicht esch es d'Frau mit de schönschte Stimm. Und dass das Tonband mängisch spinnt, hed weder mit de Frau no mit ihrere Stimm öppis z'tue. Das han i ihm au no welle säge. Aber er esch denn scho bim nächschte Abteil gstande. Und ich ha d'Ohrhörer wieder inetoh. Luut han i ned glost. Ned dass i no d'Stimm verpasse - oder de Ort, wo'n i use sett.