Ha di hüt uf Hände treit

Ecrire un commentaire

Ha di hüt uf Hände treit
Di ungersuecht u dir so gseit
Was mä mitme Baby redt
"guguu", "dadaa" u was me süsch no sött.

Mit grossä Ougä luegsch mi ah
Aus chöntisch's itze scho vrstah,
Vrsuechsch es mit dim Geischt ds erfassä,
I dä no viu wird ine passä.

Wenn ig di gseh, de frag ig mi
Was us dir wird wenni gangä bi?
Lersch redä, loufe, griifä, ässe,
Mitm Lineal ä Zentimeter mässe;

Mitm Alphabet ga Sätzli schribe,
Um ir Schueu nid hockä ds blibe.
Wohäre reisisch wennd mau euter bisch,
Derthäre wo's heiss, warm, sunnig isch?
Oder dert wo's ou im Summer schneit
U me ir Badi Parkas treit?

Wär wirsch, was dänksch, was duesch im Läbe,
Was wirsch du andre Mönsche säge?
Wär wird di erscht gross Liebi sii
U was seisch ere nachdäm dr furt sit gsii
(und äuä när e Chorb bechunsch)?
Was si dini Tröim, di gröschti Wunsch?
Was wirsch du mit dim Läbe mache,
BW, Jus, u settig Sache?
Oder wirsch im Bou ga bügle,
Wänd bemale, Muurä düble?
Oder wirsch du mau ä ganz Grosse,
Wo mit sim Tue wird d Wäut umstossä,
Wo als Ghandi Fridä predigt
Oder als General ä Chrieg erledigt?

Wirsch ä Popstar für knapp äs Jahr
Mit Sunnebrüue u gscheeltem Haar,
Ä grossä Maa, ä Dänker, Dichter,
Ä Profässer, Outor, Bänker, Richter?

Wahrschinlech füersch äs normaus Läbe
Mit Hoffnig, Tröim und de äbe
Mässig glücklech ungerem Striich,
De meischte geits hützutags ja gliich.

Ig wünschä dir, dass du chasch säge
"Ig ha öpis gmacht drus, us mim Läbe!
Glehrt wasi wott u was mir wichtig isch!"
Und zfridä wirsch mit däm wod bisch.

Mit grossä Ougä luegsch mi ah
Aus chöntisch's itze scho vrstah.
Ha di hüt uf Hände treit
U dim Mami när id Arme gleit.